BIHAINIM kamap bilong em namba wan taim long Madang long yia 1951, wantaim bikpela sekrifais na hatwok bilong Harry Hartwig, MAF nau i gat ol nupela Cessna 208 Karaven.

Wok bilong MAF i bihainim longpela rot stat long Westen Provins i go nap long Bogenvil.

Yumi harim planti stori bilong ol pipel long PNG, ol misineri na ol NGO patna long hau MAF i sevim planti komyuniti na helpim ol pipel long stap gut.

Taim yu lukim smail long pes bilong yangpela mama husat i amamas long lukim bebi bilong em i stap laip bihain long em i klostu indai long taim bilong karim; bel isi bilong papa husat i ken salim pikinini bilong em i go long skul bihain long em i wet longpela taim; amamas bilong komyuniti taim balus i bringim kaikai, wara na ol arapela samting bihain long guria; amamas bilong fama husat i ken bringim kofi bilong em i go long taun bilong salim na kisim mani; amamas bilong ol wokmanmeri taim ol i daunim wakabaut somil na ol arapela tul bilong sanapim nupela skul; ai wara bilong ol famili husat wanpela bilong ol i dai na MAF i bringim bodi i go bek long ples; hop na bel isi taim ol pipel i kisim tok bilong God long lewa bilong ol.

Olgeta dispela  samting Mission Aviation Fellowship (MAF) i mekim bilong senisim stap bilong ol pipel long ol rurel eria long Papua Niugini. Na ol i mekim dispela inap long 70 krismas nau.

Mipela i yusim Cessna C208 Caravan balus bilong brukim banis i pasim ol pipel long rurel eria long kisim helt sevis, edukesin, klin wara na tok bilong God. Mipela i bringim helpim, hop, na hiling i go long ol.

Tim bilong mipela i gat 100 nesenel na 40 intenesenel wokmanmeri. Ol i bruk namel na stap long 11-pela beis long PNG. Mipela i sevim ol lokal komyuniti, lokal sios, misineri, ol NGO, divelopmen na rilif ejensi, na ol gavman dipatmen husat i mekim wok bilong senisim laip bilong ol pipel i stap long rurel eria.