ST Barbara Limited i amamas long tokaut long Iso Ealedona, wanpela man PNG husat i kamap Jenerel Menesa long Simberi Operesin gol main long Niu Ailan Provins.

Ealedonia i gat 55 krismas na em i namba wan man long PNG long kisim dispela posisen long kampani bilong Australia.

Ealodonia i bin wok olsem Het bilong operesin long 7-pela mun,na em i soim komitmen long wok bilong em. Long 750 wokmanmeri long St Barbara Simberi Operesin, 96 pesen em ol wokmanmeri bilong PNG yet.

Kampani i save putim tingting long givim strong long ol wokmanmeri long mekim gut wok bilong ol insait long seif na helti envairomen.

Ealodonia em i maining enjinia na em i kam long Misima Ailan long Milen Be Provins.

Em i gat moa long 26 yia ekspirens long maining indastri long taim em i wok long Australia wantaim Rio Tinto Iron Ore, na Ok Tedi, Hidden Valley na Lihir long PNG.

“Kampani amamas long givim dispela posisen i go long wokman bilong PNG husat i gat skil na ekspirens long lidim 1200 wokfos long Simberi. Iso bai lidim kampani gut na long wankain taim sapotim ol komyuniti long Simberi, kontribiut i go long Niu Ailan Provins na karimaut ol komitmen bilong kampani long PNG na ol pipel,” Craig Jetson, Menesing Dairekta na Sif Ekseketiv Opisa bilong St Barbara i tok.

Mista Ealedonia i kisim dispela posisen wantaim bel isi na em i tok, em i wanbel long lidim kampani long mekim  wok maining long kantri bilong em PNG. Em i tok em bai karimaut wok bilong Simberi seif na kamap long mak bilong win.

Stat long 2009, Simberi main i mekim K84.3 milien royalti, baim 0.5 pesen prodaksen levi na kontribiutim  moa long K97.4 kontrak long ol bisnis bilong ol papagraun. Long 2020, kampani i baim moa long K28 milien long inkam takis.

Long 2012, kampani i mekim ol projek bilong helt, edukesen, infrastraksa divelopmen, rot, bris, kakao faming, marikalsa, skul skolasip na kamapim wok wantaim mani mak long K119 milien long ol pipel long Tabar Ailan.