ANTAP long testing na ol pasin bilong banisim yu yet long COVID-19, sut marasin bilong COVID-19 tu em i narapela gutpela samting we i ken banisim ol manmeri na pikinini long COVID-19 na seivim laip bilong ol.

Seketeri bilong Nesenel Dipatmen bilong Helt (NDOH), Dokta Osborne Liko i mekim dispela tok taim em i givim apdet bilong en long COVID-19 Rispon na wok redi bilong COVID-19 sut marasin.

“Maski taim yumi stat long givim sut long ol pipel long banisim ol long COVID-19 long PNG, yumi mas i go het na mekim ol namba wan pasin bilong lukautim yumi yet, ol famili na komyuniti bilong yumi,”Dokta Liko i tok.

Em i tok nius i kam olsem ol arapela kantri long wol i kisim COVID-19 banis sut na ol i orait. Na NDOH na Wol Helt Ogenaisesen (WHO) tu i wok hat long kisim sut marasin bilong PNG.

Tasol em i tok, banis sut tasol bai no inap stopim dispela pandemik. Em i tok banis sut bai strongim rispon bilong yumi long COVID-19 taim yumi yusim wantaim ol arapela rot yumi save bihainim na banisim yumi yet long en na ol i bin wok gut.

“Ol evidens i soim olsem COVID-19 banis sut i wok na i stopim sik tasol yumi no save yet sapos em bai stopim ol pipel long kisim sik. Dispela em olsem, yu kisim banis sut bai yu no inap kisim sik, tasol em bai no inap long stopim yu long givim sik long ol arapela. Na tu, no gat wanpela sut marasin em i 100 pesen strong,” Dokta Liko i tok.

Em i tok, taim sut marasin i kam long kantri yumi mas i go het long stap longwe long narapela, kus i go insait long hanskru, tambu long sekan o holimpas, wasim han klostu klostu na ol arapela pasin yumi save mekim long banisim yumi yet long COVID-19.

Rebecca Negere i raitim