PASCAL Pandau em bilong Lumi long Sandaun Provins. Na em i wok wantaim National Agriculture Reasearch Institute (NARI) moa long 20 krismas.

Bihain long Hai Skul, Pascal i bin tingting long wok long egrikalsa sekta. Na em i kisim dispela driman bilong em bihain long em i pinisim stadi long Popondetta Egrikalsa Kolis.

Em i bin kisim trening tu long Dipatmen bilong Egrikalsa Stok na Fiseri long Pot Mosbi. Na moa yet Fiseri Menesmen long Univerisity of Technology long yia 1980.

Namba wan trening bilong em i bin kamap taim em i helpim ol Baiolojis long traim kontrolim Salvinia gras long Sepik wara. Dispela gras i bin pasim 500 kilomita bilong wara na hat long ol pipel long go kam long skul na haus sik.

Bihain em i bin go kisim trening gen long Kastertart Yunivesiti long Thailand. Stadi bilong em i bin helpim em long kamapim rot bilong pasim lokas, wanpela kain grasopa long Markham Veli, Morobe Provins.

Pascal i pinis long wok taim em i gat 62 krismas. Planti wanwok bilong em tok em i wanpela gutpela wok man husat i save sapotim gut ol arapela wanwok.

Long taim em i wok wantaim NARI, em i save lukautim wok bilong kontrolim ol binatang na gras no gut we i save bagarapim ol kaikai na keskrop.

Mista Pandau i no man bilong toktok tumas tasol em i save mekim wok bilong em gut na pinisim long taim.

“Olgeta taim em i go long fil, Mista Pandau i save karim liklik buk wantaim em na raitim olgeta samting em i lukim.” Mirriam Simin, Risets Opisa long Momase Rijinal senta long Lae i tok.

Long taim em i kisim gutbai presen bilong em, Pandau i tok i gat planti wok bilong ol diwai na binatang nogut i stap bilong mekim.

Wok bilong em wantaim NARI i soim trupela komitmen na i kamapim ol gutpela diveopmen.

Em i tok tenkyu long Sinia Entomologist Dokta Sim Sar, husat em i wok wantaim long longpela taim. Dokta Sar tu i bin pinis wok long NARI long yia 2020.

Em i save serim planti infomesin bilong egrikalsa wantaim ol komyuniti long olgeta wik wantaim Redio Morobe.

Pandau i marit long wanpela meri Lumi long liklik ples Sigaite long Wes Sepik na em i gat 6-pela pikinini na planti tumbuna.