KOKONAS Indastri Koporesen (KIK) i tokaut pinis olsem em i redi long lusim Tapo wara sek-poin na go long nupela ples.

Nupela ples em Mano wara na dispela i stap 12 kilomita longwe long Tapo wara.

Sekpoin i kamap bilong sekim ol samting long stopim na banisim kamap bilong sik Bogia Kokonas Sindrom (BCS). Dispela sik i save kamap na bagarapim ol plents.

KIK i lusim Tapo sekpoin bikos i gat plen long wokim nupela bris antap long Tapo wet-krosing bris.

KIK Senia Risets Opisa long Stewart Risets Stesin, Alfred Kembu i tok KIK i bin toktok wantaim ol pipel bilong Mano viles na ol i amamas na givim graun long sekpoin i kamap.

Mista Kembu i tokaut tu olsem long las yia Disemba KIK i bin baim ol papagraun bilong Mano 50 pesen hap bilong 40-yia lis agrimen bilong graun.

Em i tok bikpela samting em ol stekholda i mas save na klia long ol toktok bilong dispela projek.

KIK, Dipatmen ov Egrikalsa na Laipstok (DAL), Nesenel Egrikalsa “Quaratine” na Inspeksen Atoriti (NAQIA) na PNG Kakao Indastri Bod i save wok bung long sekim ol kar long rausim ol kru kokonas na ol arapela bus samting long banisim sik BCS.

Mista Kembu i tok Mano sekpoin bai i gat ol haus we i gat ol opis tu.

Em i amamas long ol Ului klen bilong Mano viles long wanbel na givim graun.

Mausman bilong Ului klen, Alex Isogu i tok tenkyu long KIK long luksave long eria bilong ol na  i tok dispela bai helpim ol pipel tu long sait bilong mekim ol liklik bisnis olsem maket long salim ol fres kaikai long ol manmeri husat i ran i go kam long haiwe na kisim liklik mani

James G. Kila i raitim