LONG 17 Februeri wanpela seremoni bilong sainim Leta Ov Agrimen (LOA) namel long Foundation Of Women In Agriculture Development (FOWIAD) na Sapot Long Rurel Bisnis, Invesmen Na Tred (STREIT) long Hayfield, Maprik, Is Sepik Provins.

Long dispela taim Food and Agriculture Organisation(FAO) Het bilong Misin Ken Shimizu i tok bikpela, wok bilong kakao, vanila na pis i go het stret long dispela yia 2021.

Mista Shimizu i tok dispela progrem em bilong helpim  ol fama Iong go insait long maket bilong salim ol egrikalsa prodak bilong ol.

 Em i tok ol bai lukluk long veliu sen sapot sevis olsem, wokim rot, givim skul long pasin bilong lukautim mani, skulim fama long painim maket long intanet, riniuebel eneji na lukluk long helpim ol meri na yut long stap insait long wok egrikalsa.

“Yia 2020 em yia bilong statim wok na em wanpela hatpela yia tru wantaim hevi bilong coronavirus we i mekim hat long salim ol intenesinel ekspet long kam long kantri na helpim. Tasol ol i bin traim hat tru long wokim projek opis long Wewak na Vanimo, wokim maping na givim skul long vanila na kakao na givim aut tu klostu 40 tausen kakao klons,” em i tok.

Shimizu i tok maski dispela ol salens i stap, ol i bin inap long kamapim sampela wok olsem long tupela provins bilong Sepik Rijon pinis. Long dispela namba tu yia bilong projek em i tok International Labour Organisation(ILO) bai i lukluk long wokim klostu 300 kilomita rot long na dispela wok i stat pinis.

FAO het bilong Misin i tok, insait long dispela wok bung wantaim FOWIAD na ol araprla tu, ol bai  lukluk long trenim 50 yut grup, wantaim klostu 1,400 yut na 600 meri. Ol bai i givim aut tu 100 tausen sid klon kakao, na setim 10-pela demonstresen blok.

Shimizu i tok moa olsem, "kaikai bilong dispela program bai kamap taim ol fama manmeri i givim sapot na wok insait long program bikos, dispela em i no program bilong FAO. Nogat. Em bilong yupela ol pipel bilong dispela rijon."

 Wankain taim long pinis tok, em i tok tenkyu long olgeta manmeri fama na olgeta long welkamim FAO STREIT long go insait long provins na distrik, na tu tok tenkyu long bilip long FAO na wok ol i mekim long en.

Jonathan Poema i raitim