OL papagraun bilong Koiari long Sentral provins i wanbel long Sky Rail projek NCD Gavana Powes
Parkop i laik kamapim.

Dispela kain projek em i namba wan insait long kantri na em bai inap bringim bikpela ekonomik
benefit i go long ol papagraun.
Long wanpela miting long Sogeri, ol representetiv bilong Koiari long ples we projek bai kamap i tok
orait long dispela projek i mas kamap.
Sky Rail projek mausman na foma Sif Ekseketiv Opisa (CEO) bilong Kokoda Trek Atoriti James Enage i
tokim ol papagraun olsem dispela projek inap divelopim ikonomi bilong ol na tu Sentral provins na
NCD bai benefit.
Enage i tok i gat faivpela investa i redi long wok long pulim kebol waia long bildim Sky Rail projek.
Tasol ol papagraun i mas holim wanpela miting pastaim na kamap wantaim disisen na bihain toktok
long opis bilong NCD Gavana.
Em i tok Gavana Parkop i bin tingting long statim dispela projek olsem mega projek long bringim turis
na givim sans long ol papagraun tekpat long wok bisnis.
Enage i tok NCDC i givim K1 milien long statim fisibiliti stadi na disain na ol i wet long ol papagraun
long kamap wantaim fainel disisen bilong ol.
Dispela Sky Rail projek bai kostim gavman mani mak olsem K500 milien. Projek bai stat long
Adventure Pak ausait long Pot Mosbi na bai konektim Hombrom, Bluff Inn, i go long Owers Kona,
Varirata Nesenel Pak na i go kamap long Sirinumu dem.
Enage i tok projek bai i gat ikonomik veliu na em i laikim ol asples long wok strong long kamapim
dispela projek long helpim ol long bihaintaim.
Ol papagraun i luksave long ol infomesen bilong dispela projek na bai ol i go toktok wantaim ol
komyuniti bilong ol wan wan pastaim long ol i kam bek wantaim fainel disisen long Februari 24.

Joseph Dawai i raitim