“YIA 2020 i bin hatpela yia taim COVID-19 i bin kamap long wol na long kantri (PNG).

Planti salens i bin kamap long ol bisnis na ol pipel. BSP i gat bilip olsem ikonomi bai kamap gut long
2021.” BSP Grup Sif Ekeseketiv opisa Robin Flemming i tok.
Em i tok em i bikpela salens long benk long wok hat long taim bilong COVID-19. Long dispela taim, i
bin gat ol hevi na ol gutpela samting i kamap.
“Global ikonomik bai suruk i go antap long 4 pesen long 2021. Ikonomi bilong PNG bai kamap gut
long 2.5 pesen”.
Em i tok global ikonomi bai suruk i go antap long 4 pesen bihain long em i bin pundaun long 4.3
pesen long 2020. Ol edvens ikonomi bai kamap gut long 3.3 pesen na 3.5 pesen long 2021 na 2022.
Pasifik bai kamap gut long 1.3 pesen.
Ikonomi long Fiji, Solomon Ailan, Vanuatu bai kamap gut long 2021, tasol bai stap daunbilo long level
bilong 2019. Tonga, Samoa na Cook Ailan bai kisim taim yet bikos long ristriksen long trevol na ol
arapela kain kain ristriksen.
“Ol bikpela projek olsem Wafi-Golpu we i gat mani mak long K18.4 bilien i kisim tok orait bilong
envairomen pinis, na olgeta pati i sainim pinis PNG LNG agrimen. Na long wankain taim Porgera
Main bai op bek klostu taim.
Mista Flemming i tok ikonomi bilong PNG i dipen long ol dispela bikpela projek.
“Taim global rolaut bilong COVID-19 vesiknesin i kamap long 2021, em bai rausim sampela ristriksen
long intanesel balus. Dispela bai helpim ol hotel na kampani bilong ol balus long mekim mani” Mista
Flemming i tok.

Carolyne Ketsimur i raitim