HOLIDE i pinis na em taim bilong ol sumatin long go bek long skul.

Long dispela taim, MAF i wok long karim ol planti sumatin i go long Baibel skul long Hailans.
Long tripela wik i go pinis, MAF balus long Wewak i karim ol famili na ol singol man husat i go skul
long SSEC long Hailans rijon. Dispela skul em Bible and Character Development Skul Program bilong
tupela yia long Aviamp, Popun long Saut Anglimp, Jiwaka Provins.
Em i liklik Baibel skul we ol German Liebenzell Misineri Gerhard na Brigitte Stamm i bin kamapim.
Tasol nau tripela lokal tisa na pasto i ranim bihain long Gerhard i dai long 2019.
Dispela Baibel skul i no laikim ol gutpela akedemik mak. Astingting bilong ol em long trenim ol pasto
bilong ol rurel eria long save long rot bilong stap gut olsem famili bilong God na skulim tok bilong
God long ol pipel.
Tripela pasto wantaim ol famili bilong ol long Sepik Haiwe long Wewak i bin go long Hailans.
Manuel Feige husat i save wok long Liebenzell Misin long Wewak i salim ol i go long kisim moa skul
long go hetim wok bilong autim tok bilong God long ol ples bilong ol.
Olgeta i amamas tru taim ol i kamap long Maunt Hagen. Ol lain long Aviamp Baibel skul i welkamim
ol gut na kisim ol olsem hap bilong famili bilong ol.
Na long sampela taim i go pinis, MAF balus long Wewak i bin bringim narapela yangpela famili na
sampela singol man bilong Ambunti na Nungwaia long statim skul long tupela yia.
I gat sampela bilong Lake Kutubu na Simbu i kam na redi long skul.
Yu ken mekim buking bilong yu wantaim MAF balus long Whatsapp namba 70440433 o ringim ol
long 73739999. Yu ken salim tok long email This email address is being protected from spambots. You need JavaScript enabled to view it.