GLENYS Watson i bin stat wok wantaim MAF olsem pailat na i save flaim balus (Twin Otter) long
Goroka. Bihain em i trensfe i go long narapela balus, Cessna Caravan.

Bihainim disepla trensfe, em i mas lainim sampela nupela senis wantaim sat na namba bilong balus
na tu menesim ran bilong balus em yet wantaim ol pasindia, kago na tiket long ol ples longwe long ol
rurel eria.
Dispela em hatpela wok olsem pailat we em i mas putim olgeta tingting bilong en long wok bilong
em.
Long Disemba 2020, Glenys i bin kisim narapela wok gen. Em i stat long karim liklik blakpela bokis
long balus taim em i lusim Goroka.
“Stat long Disemba, mi bin wok long karim Baibel bokis taim mi lusim Goroka. Mi salim moa long 500
samting insait long dispela bokis. Em ol buk Baibel, Baibel rekot bilong harim, ol liklik memori kat we
i gat muvi bilong Jisas na ol ai glas bilong ol pipel long ritim Baibel.”
Em i tok taim em i kamap long ol liklik ples balus, ol manmeri i save kam askim long Baibel bokis.
Dispela i soim olsem, tok bilong God i sutim bel bilong ol na ol laik rit, harim na lukim moa stori
bilong Baibel.
Sampela taim bokis i save pinis kwiktaim long namba wan ples balus em i go long en. Ol pipel i laikim
tumas Baibel.
“Guasa long Isten Hailans, em wanpela bilong ol ples balus we ol pipel i save resis tru long baim
Baibel. Narapela em long Bungowat. Mi amamas long wok mi mekim long helpim ol pipel long rurel
eria long gat ekses long tok bilong God.” Glenys i tok.