MaryLois Kepas em level tu sumatin long Human Development Institute (HDI). Em i greduet pinis na i redi long go het long level tri.

MaryLois em mama bilong tupela pikinini. Bipo long em i stat skul long HDI, em i save stap tasol long haus na lukautim famili bilong em.

Em i gat Digri bilong Maining na em i bin wok long Maining indastri, tasol em i bin lusim wok na stap tasol long haus.

MaryLois i bin save long HDI taim em i go lotu na harim ol mama i toktok long dispela skul. Em i harim stori na em i pilim bikpela laik long go skul na kisim save bilong mekim mani na bisnis.

Long Janueri, MaryLois i statim skul bilong em long HDI, level wan. Insait long wanpela wik, em i kirap nogut olsem em i mekim K409.00 long wanpela wik. Taget mani bilong em long level wan em K171, tasol MaryLois i abrusim na i kisim K409.00

“Em i nupela samting long mi, taim mi joinim HDI. Bikos mi save tasol long fomal skul, we mipela sindaun tasol long klasrum na tisa skulim mipela. Long HDI, mipela skul na wankain taim mekim samting mipela lainim. Mi bin painim hat long sindaun long maket, tasol mi amamas mi brukim dispela sem na mi ken salim keik bilong mi na gat mani olgeta de na mi ken lukautim famili bilong mi,” MaryLois i tok.

Em i tok HDI i skulim em long luksave long strong bilong em na tu save long plenim wok bilong em.

MaryLois i divelopim skil bilong em long kukim keik na maket bilong em i kamap gut.  Em i save kisim K100 long wanpela de, na K500 long wanpela wik.

Em i amamas na tok tenkyu tru long HDI long gutpela skul em i givim. Na tu em tok tenkyu long Papa Sam long gutpela wok em i mekim bilong helpim ol pipel bilong Papua Niugini.

Carolyne Ketsimur i raitim