Gavana bilong Morobe Provins, Ginson Saonu i mekim strongpela tok las wik olsem, em na ol pipel bilong em i redi long pait strong long stopim Deep Sea Tailings Placement (DSTP).

Em i askim tu Memba bilong Huon na Member bilong Bulolo long sanap wantaim em long rausim dispela hevi.

Gavana Ginson i tok em i givim tok orait pinis long ol Loya long go het na statim ligal wok bilong DSTP. Ol i redi long kisim Gavman na Wafi-Golpu i go long kot.

“YES to Wafi-Golpu, No to DSTP”, Dispela em het tok ol pipel bilong Morobe Provins i sanap strong long en.

“Mipela i wanbel long main, tasol mipela i no wanbel long DSTP” Gavana Saonu i  tok.

Ol pipel bilong Morobe i no wanbel long Gavman na Wafi-Golpu Joint Venture (WGJV) bikos ol i no harim tok na bihainim tingting na laik bilong ol.

Gavman na WGJV i no wari long envairomen bikos ol i tingim mani tasol. Ol i no wari long ol “Red Flags” Baiolojis bilong PNG, Profesa Ralph Mana i tokaut long en taim em i mekim wok painimaut bilong en.

 Bikpela populesen bilong pipel bilong Morobe i dipen long solwara long kisim kaikai. Olsem na ol i redi long pait strong long stopim DSTP.

Gavana i askim olgeta sios long sanap na wokbung wantaim na pait long rait bilong ol pipel long Morobe.

Aste Trinde 10, Februeri 2021, Forum bilong DSTP long Lae, i bin kamap long Sir Ignatius Kilage Stadium. Gavana i askim olgeta manmeri long kam na autim tingting na wari bilong ol long pait egensim DSTP.

Deep Sea Tailings Placement Sistem em wanpela rot we ol maining kampani i save rausim ol pipia na posin marasin bilong maining long solwara.