OL level tu sumatin bilong Human Development Institute (HDI) i bin greduet long Fraide 5 Janueri 2021.

Long taim em i givim tok bilong em long greduesen, Faunda bilong HDI Papa Sam i tok, ol manmeri i mas investim ol mani bilong ol. Taim yu inves, bai u gat moa mani.

Papa Sam i tok planti manmeri i save tok PNG em i no inap long gat planti mani, tasol ol sumatin husat i kam skul long HDI i soim olsem dispela tok em i no tru. Bikos ol i mekim moa long K5, 000 long wanpela wik tasol.

Ol dispela sumatin i bin pinisim level wan bilong skul, na ol i kam antap long level tu we nau ol i pinisim na redi long go long level tri.

I gat 7-pela level long HDI, tasol long 25 yia skul i ran, i no gat wanpela sumatin i abrusim level 4 yet.

Papa Sam i tok em i hop dispela yia 2021 bai gat wanpela o moa sumatin i abrusim level 4 na suruk i go long level 5 na pinisim long level 7.

Ol 19 sumatin husat i bin greduet i amamas tru long skul ol i kisim long HDI. Planti bilong ol i lusim ol profesenel wok bilong ol na kam long skul.

Ol i tok, bikos long HDI na ol i gat mani olgeta de long poket bilong ol. Ol askim moa pipel long kam na skul long HDI.

Dispela skul i no nidim ol save manmeri long kam na skul. Em i tru tru skul bilong ol grasruts husat i laik kisim save long  mekim mani.

Long wankain taim,dispela trening em wanpela gutpela rot bilong kisim bek PNG. Olgeta manmeri i mas sanap strong na pinisim pasin bilong dipen long gavman olgeta taim, Papa Sam i tok.

Em i tok tu olsem em wanpela gutpela astingting bilong hettok bipo Presiden bilong America John F Kennedy i bin mekim “Don’t ask what the government can do for you, but ask what you can do for the government” o  “No ken askim wanem samting bai gavman i mekim long yu, tasol yu mas askim wanem samting bai yu mekim long gavman”.

HDI em wanpela skul  tasol long PNG we i skulim ol manmeri long rot bilong mekim mani. Em i skulim ol manmeri long yusim tingting bilong ol long mekim mani na kamap rits.

“Sapos olgeta manmeri i kisim dispela save bilong mekim mani, bai kantri (PNG) i gat planti mani tru,” Samuel Tam (Papa Sam), Faunda bilong HDI i tok.

Carolyne Ketsimur i raitim