OL FOREN Investa husat i kam insait long kantri na mekim wok ol asples Papua Niugini i ken mekim i mas pasim wok bilong ol.

James Ketela, 32, husat em i wanpela kontrakta long Pot Mosbi i tokim Wantok Niuspepa olsem sampela wok kontrak inap long ol lokal yet i mekim em ol i wok long givim long ol ovasis kampani.

Mista Ketela i tok ol manmeri i wok long kamap olsem wokboi long graun bilong yumi yet na ol manmeri i kam long narapela kantri i wok long bosim yumi na pasim spes.

“Ol wok manmeri bilong yumi husat i gat wankain save olsem ol foren woka i save kisim K6000 long wanpela yia na forena i save kisim K200,000 long wankain save na wok ol lokal i save mekim,” em i tok.

“Kain mani ol i baim ol forena em ol inap long kisim olsem 20 na givim ol wok.

“I luk olsem sampela lo i no stret na kantri bilong yumi i no ran gut.”

Namba bilong ol pipel i no gat wok i go long go antap moa na em i wok long givim hevi long gavman, praivet sekta na sios i stretim.

Em i tok wok bilong impotim o kisim i kam insait long guds bilong narapela kantri tu i no stret.

Em i tok gavman i wok long baim nating rais na lusim mani bikos ol lokal manmeri i planim rais long 30 na 40 yia moa i go pinis.

Dispela ol fama i kamapim moa long 1000 tan rais long eria bilong ol tasol i no gat luksave bilong gavman.

Em i tok planti digri holda i no gat wok na i stap long setelmen na ol pablik sevan i slip wantaim planti famili long wanpela haus na ol sik i bagarapim ol.

Em i tok gavman i mas luksave long dispela ol hevi na stretim ol sapos em i laik kisim bek PNG.

Joseph Dawai i raitim