GAVMAN i sainim Fiskal Risponsibiliti Agrimen wantaim Total LNG long Mosbi long Tunde long statim US$13 bilien (K43.3b) Papua LNG projek.

Dispela agrimen em i stat bilong ol arapela divelopmen bilong projek long kamap.

Ol projek patna olsem ExxonMobil na Oil Search i sainim tu dispela agrimen long Gavman Haus long Konedobu.

Total i bin plen long poromanim dispela projek long divelopim tu P’nyang gas tasol ExxonMobil i no amamas long ol agrimen gavman i makim long kamap long P’ynang na olsem Total i go het long sainim agrimen long divelopim Papua LNG projek tasol.

Petrolium Minista, Kerenga Kua i makim gavman long sainim dispela agrimen.

Em i tok long taim projek i kamap bai i gat tupela LNG tren (paip) i go long LNG Plent sait long Caution Bay, klostu long Pot Mosbi.

Em i tok projek bai kamapim 54 milien metrik tan bilong gas long wan wan yia.

Em i no klia we Total bai kisim mani long divelopim dispela projek tasol dispela agrimen i soim olsem em i gat mani na i redi long go het long divelopim projek.

Ol arapela wok we i mas kamap em:

• Fran End Ensiniering Konsep Disain Plen (FEED);
• Fisikol Paiplain Asesmen na ol stadi bilong em;
• Envairomen Impek Stetmen;
• Sosel meping na klen veting;
• Ol benefit olgeta stekholda na ol papagraun bai kisim long em;
• Fainensiel Invesmen Disisen (FID) na
• Konstraksen wok.

Elk na Antelope em PRL 15 i tupela bikpela gas fil long Baimuru, Galp provins we bai kamapim Papua LNG projek.