EM i longpela taim tru ol mama long Konoagil i kisim taim long hevi bilong painim trenspot i go long maket long salim ol gaden kaikai bilong ol.

Ol gaden kaikai bilong ol i save bagarap nating bikos ol i no nap salim.

Tasol long Fraide 29 Janueri, ol mama i bin amamas tru taim Gavana Sir Julius Chan i givim nupela kar long Konoagil Women’s Maket Asosiesen long Marinzuan.

“Sir Julius yu harim krai bilong mipela ol mama long Is Kos Konoagil. Yu save long wari bilong mipela na yu givim dispela kar long mipela. Tenkyu tru long luksave bilong gavman bilong yu,” Mausmeri Bobbi Nedom i tok.

Bobbi Nedom husat i makim Konoagil Women’s Maket Asosiesen i bin askim Gavana long helpim ol wantaim kar las yia. Gavana Chan i harim askim bilong ol bikos em i sanap strong long het tok bilong em “The further you are, the more we care” o “ Yu wok strong na kamap gut, mipela bai helpim yu”.

Gavana Chan i tok em i no inap lus tingting long Konoagil. Konoagil bai kamap namba wan kona na ino las kona.

Wok bilong rot i go long Is Kos Konoagil i stat pinis olsem na  Sir Julius i bin givim dispela kar.

Long wankain taim tu, Sir Julius i givim ol instramen bilong musik i go long Siar Yut Kwaia grup. Em i go visitim tu matmat bilong ol bikman bilong Niu Ailan Dick Lanzarote long Manmo, Apet Pirqup long Ruka, Tommy Aminio long Alumfi na Peter Chan long Kombon.

Na long Kavieng em i go sekim Malti-kompleks Spot Stedium long Kopkop  koles we bai op long 16 Septemba 2021.

“Mipela bai go het long bringim planti projek bikos mipela laikim gutpela taim bihain bilong ol pipel bilong Niu Ailan. Mipela laik senisim Niu Ailan bai sanap strong na kamap atonomus ples long Papua Niugini,” Sir Julius tok.

Carolyne Ketsimur i raitim