LAS wik Fraide 29, Eagle PV Bisnis Skim i bin lonsim buk bilong en long Sione Kami Memorial Haus lotu.

Astingting bilong dispela buk em long soim olsem yumi olgeta pipel long Papua Niugini i ken kisim bek kantri long pasin wokbung wantaim  bilong helpim wanpela narapela.

Eagle PV Bisnis Skim em i ken kamap wanpela draiva bilong helpim gavman long kisim bek kantri. Em i ogenaisesin we ol strongpela manmeri bilong PNG yet i kamapim wantaim tingting bilong helpim narapela na mekim ol projek we i ken mekim mani.

Eagle PV Bisnis Skim i wokbung wantaim Human Development Institiute (HDI) na Womens Micro Benk Ltd long helpim ol pipel bilong Papua Niugini long gat moa mani long poket na rausim pasin bilong wetim helpim bilong gavman.

Henry Vuia wanpela bilong ol lain i statim Eagle PV Bisnis skim i tok “Kontribiusen bilong mipela i go long tok bilong PM Marape long kisim bek PNG, em long skulim ol pipel long wok hat na win long lukautim ol yet,”.

Em i tok dispela buk i kamap bikos ol i gat visen na misen bilong helpim ol lain husat i hat long painim mani. Buk bai givim strong long ol pipel long rot long mekim na basetim mani.

Samuel Tam (Papa Sam), Faunda bilong HDI i amamas tru olsem Eagle PV Bisnis Skim i wokbung wantaim HDI long karimaut dispela skul bilong mekim mani.

Em i gat bikpela laik tru long helpim na sapotim ol pipel bilong PNG olsem na em i givim bel na taim bilong em long skulim ol pipel long mekim bisnis.

HDI em i skul we i givim save bilong mekim bisnis. Yu kisim save bilong mekim bisnis na long wankain taim yu mekim bisnis i kamap.

Dispela skul i stap  25 krismas long NCD na i skulim moa long 43,000 sumatin. Na em  i wokbung wantaim Eagle PV Bisnis Skim.

Planti mama i kisim strong long dispela skul na ol i ken lukautim famili bilong ol yet. Ol i no wetim mani bilong man bilong ol o askim long ol wantok.

Carolyne Ketsimur i raitim