OL WOKMANMERI bilong Nesenel Kepital Distrik Komisin (NCDC) Maket Atoriti i stap long Kokopo las wik long mekim wok painimaut long wok poro long kisim ol kaikai long Is Nu Britan i go salim long ol maket long Mosbi siti.

Bossman bilong NCDC Maket Atoriti, David Uki i tok, as tingting bilong raun lukluk bilong ol em long kirapim wok poro wantaim Is Nu Britan Maket Atoriti long baim na salim ol kaikai i go long Mosbi siti bikos Mosbi.

Uki i tok olsem, taim ol i raun long Kokopo maket ol i painimaut olsem i gat planti taro na banana i stap tasol no gat inap lain long baim ol dispela kaikai.

“Mipela i wok poro wantaim hailans rijon na i kamap gut. Mipela baim kaikai i kam long Mosbi siti na salim,” Uki i tok.

Em it ok ol laik wokim wankain wantaim ENB Maket Atoriti. Em i tok dispela bai helpim ol fama long ples i kisim mani long lukautim sindaun bilong ol.

Ol tim i kam long Pot Mosbi i tok ol i amamas tru long lukim Kokopo maket  we no gat pipia i stap long en.

 David Uki i tok olsem ol maket long ENB  em i naispela we yu i no inap lukim pipia na spet buai i stap long en. Em i tok olsem hap bilong tromoi pipia ol i setim gut na i klin na no gat smel i kamap long en.

Uki i tok ol manmeri bilong ENB i save harim tok na i no mekim pipia long taun na maket i stap klin.

Maski ol i salim buai long Kokopo maket, ol manmeri i no save kaikai buai na spet insait long maket, Uki i tok.

Em i tok dispela i soim stret olsem ENB pipel na maket bilong ol i klin na em i nambawan long kantri PNG.

Michael Novingu i raitim