INTERNAL Revenue Commission (IRC) i bin opim wok plen bilong yia 2021 las wik long Fonde 28 Janueri.

Long taim Komisina Jenerel Sam Koim i mekim toktok bilong em, em i tokaut long ol samting we i bin kamap long yia 2020.

Em i tok 2020 i bin gat bikpela salens tru long IRC bikos long hevi bilong COVID-19.

Long Epril 2020, IRC ino bin mekim mani. Em i bin lus long kisim K2.16 bilien. Tasol bikos long sampela rot we IRC i bin mekim long banisim em yet long hevi na em i mekim mani mak long K8.2 bilien.

Long dispela mani, K578 milien (60 pesen GST) i go long ol Provinsal gavman, K228 milien i go long ol takis peia na K8 milien i go long ol Provinsal gavman olsem. Olgeta  peimen i go aut inap olsem K814 milien na K7.38 milien bihain long takis na ol arapela sas i go long Waigani Pablik Akaun (WPA) bilong Nesenel baset.

 Takis bilong potnait bilong wan wan tasol  i bin kamap gut wantaim 10 pesen i go antap. Olgeta narapela takis mani nogat. Maining na Petroleum i pundaun long 75 pesen.

IRC i save kisim moa long 80 pesen mani bilong fandim Nesenel baset, tasol em i dipen yet long gavman long fanding sapot. Long 2020, IRC i bin kisim K88.6 milien long Dipatmen bilong Fainens. Na dispela em 81 pesen tasol bilong K109.6 milien we em i mas kisim.

IRC i nidim fanding i mas kamap gut bai em i ken mekim impruvmen long revenyu bilong wanpela yia.

Mista Koim i tok, “IRC i redi long go insait long nupela wok disain.Visen bilong mi em long tanim IRC bai kamap Robust (strong na helti), Modern (i bilong dispela taim) na Effficient (i win long kamapim gutpela mak bilong wok) long Edministresen bilong takis long pinis bilong 2025. Wantaim dispela visen, mipela i kamap wantaim sampela rot bilong mekim dispela tingting i kamap namel long yia 2021 na 2025.”

Carolyne Ketsimur i raitim