OL Sinia Menesmen bilong Benk ov Saut Pasifik (BSP) i bin visitim ol brens na sab-brens long Is na Wes Sepik Provins las wik.

Sif Ekseketiv Opisa bilong BSP, Robin Flemming wantaim Ritel Jenerel Menesa Daniel Faunt na Ritel Deputi Jenerel Menesa Peter Komon i go long visitim wanpela brens na tupela sab-brens  long Is Sepik na wanpela sab-brens long Sandaun Provins.

Ol dispela BSP brens i save sevim bikpela populesen bilong ol pipel long rurel eria wantaim ol pablik seven long Sepik.

Long dispela visit, ol i bungim ol wokmanmeri na givim tok amamas i go long ol long wok bilong ol. Na long wankain taim ol i bungim Distrik Edministreta bilong Maprik Joshua Himinato.

Long bung bilong ol, ol i toktok long apim namba bilong ol wokmanmeri long ol brens bilong inapim laik bilong ol bisnis we i wok long kamap planti long Is na Wes Sepik.

Dispela em i namba wan visit bilong tupela sinia menesa Daniel Faunt na Peter Komon. Ol i bin gat taim long visitim ol maket, ol lokal infomol bisnis na sekim ol EFTOS masin long ples balus na ol stoa.

Ol tok tenkyu long gutpela wok bilong ol wokmanmeri bilong Wewak na Aitape BSP brens long harim na helpim ol wari na askim bilong ol kastoma bilong ol.

BSP em i wanpela benk tasol i stap long Maprik, Yangoru na Aitape we i sevim ol pipel.

Carolyne Ketsimur i raitim