MEMBA bilong Rabaul, Dokta Allan Marat i bekim K1.25 milien dinau mani em distrik i gat long Micro Finance.

Dokta Marat i givim dispela mani long Rabaul i no longtaim i go pinis.

Bosman bilong Micro Finance Benk Sammy Narawagin i tenkyu long Dokta Marat na i tok Memba i bihainim tok bilong em na i mekim olsem.

Ol manmeri long distrik i bin kisim dispela dinau mani long benk long mekim ol liklik i go long namel sais bisnis (SME) wok na olsem Marat i mas bekim wantaim win mani.

Dokta Marat i tok Sentrel Benk i stopim wok bisnis bilong em long wanem Rabaul Micro Finance i no kamap long mak bilong laisens we benk i laikim long em.

Em i tok Rabaul Micro Finance i no bihainim lo bilong benk long karimaut wok bisnis bilong ol na ol i stopim wok bilong ol.

Narawagin i tok bikos long dispela Sentrel Benk i stopim Rabaul Micro Finance long karimaut wok bisnis.

Tasol em i tok i no gat gutpela pepa wok bilong ol long sekim ol toktok na mekim wok.

Narawagin i tok em i no bin isi long kirapim gen wok bisnis bihain long ol olpela bosman i lusim wok long 2011.

Em i tok bihain long dispela wok i bin pas.

Em i tok em i bin hatpela wok long stretim ol pepa na save long ol lain manmeri husat i kisim dinau mani.

Narawagin i tok bikpela salens bilong NRML long stretim ol rekod bilong ol samting i stap long ol samting (assets) na ol dinau mani long wanem ol pepa i no stap nau long benk.

Em i tok benk bai yusim ol toktok i stap long benk sistem long stretim ol wok i bagarap.

Moa yet, em i tok taim ol i kisim bek ol dinau ol bai stretim ol toktok wantaim Sentrel Benk long kisim laisens long kirapim bek wok.

Long wankain taim, Dokta Marat i tok Rabaul Micro Finance i mas wok wantaim ol distrik long provins i kamapim ol Bod ov Dairetka long lukluk long wok bilong ol bikos benk em i bilong ol pipel.

Michael Novingu i raitim