KAVIENG nau i luk brait wantaim 178 sola lait long ol komyuniti, skul, etpos, komyuniti hol, pilai graun na ol helt senta long Tench, Lambom, Tanir na Pukpuk.

Long Kavieng distrik i gat 77 lait i stap. I gat 24 lait long Kavieng eben, 21 lait long Lavongai LLG na 32 long Tikana LLG. Murat LLG i gat 23 sola lait ino yet long putim. Total rolaut bilong olgeta lait long Niu Ailan long 2019 em 176.

Long Namatanai distrik, 101 sola strit lait ol i putim long namba tu rolaut. Sentral LLG i gat 18, Namatanai i gat 26, Matalai LLG i gat 17, Tanir LLG i gat 26 na Konoagi LLG i gat 14 lait. Na dispela inap long 226 sola lait long Namatanai distrik stat long 2019.

“Ol manmeri i amamas na tok tenkyu long Sir Julius Chan na Gavman bilong em long bringim ol dispela lait i kam long Niu Ailan. Nau olgeta pablik ples olsem haus sik, hai skul, praimeri skul, Elementri i gat brait lait long nait,” Het bilong Gavman Laison opisa bilong Namatanai distrik Trevor Kamaga i tok.

Em i tok dispela em visen bilong Sir Julius long bringim lait na mekim  Niu Ailan Provins i luk brait.

Long taim dispela projek i pinis, total bilong ol lait bai 401 long seken rolaut na em inapim mani mak olsem K2,786,200.24