POT MOSBI- EXXONMOBIL i makim nupela Menesing Dairekta Peter Larden long kisim posisen long Pot Mosbi, Papua Niugini.

Peter Larden em i presiden bilong ExxonMobil Limited long Canada long taim em i kisim dispela posisen. Olpela Menesing Dairekta Andrew Barry bai kisim posisen olsem vais presiden bilong Global LNG Maketing bilong ExxonMobil long Singapore.

Larden i bin stat wok wantaim ExxonMobil long Melbourne long Australia long yia 2005. Em i bin holim ol sinia posisen long Australia, United States, United Kingdom na Africa. Na em i bin wok wantaim PNG LNG projek tu.

Olsem presiden bilong ExxonMobil long Canada, em  i save go pas long prodaksen, divelopmen na eksploresen intres long Atlantic Canada na Westen Canada.

“Peter em i redi long wok wantaim ol pipel bilong Papua Niugini long kamapim gutpela wok. Wok bilong em bai kamapim planti bisnis bilong ol kampani long PNG na helpim long kamapim gutpela sindaun long taim bihain,” Barry i tok.

Barry i bin stat wok long PNG long yia 2014. Aninit long lidasip bilong em, ExxonMobil i kamapim planti gutpela wok long PNG LNG projek. Divelopmen na prodaksen bilong kampani em i kamap gut.

“Mi amamas olsem mi bin kisim gutpela sans long lidim bisnis long stat i kam inap em i kamap gut. Na dispela em bikpela samting tru long laip na wok bilong mi.” Em i tok.

Carolyne Ketsimur i raitim