LONG Desemba 2020, Hides Gas Divelopmen Company (HGDC) Eneji Sevis Ltd i bin winim awot bilong PNG LNG Projek aninit long “Best Nesenel Konten Kontribusen bilong  yia”.

HGDC Eneji Sevis i bin kisim luksave long dispela bikos long hatwok bilong kampani long givim wok long ol lokal, kamapim sans long mekim bisnis na wokfos divelopmen.

Long tok amamas long papagraun kampani bilong Hela, ExxonMobil PNG Limited (EMPNG) Nesenel Konten Menesa, Sisa Kini i tok “Mipela amamas tru long HGDC Eneji Sevis long gutpela wok na win bilong en”.

Long 2009, kampani i mekim wokfos divelopmen taim em i kamapim ol program olsem;

• Aprentis bilong ol mekenikal fita
• Wokfos bilong ol meri
• Mentoring program bilong ol lain husat i stat wok na helpim ol i kamap namba wan long wok bilong ol.

Insait long kampani, 99 pesen bilong ol wokmanmeri i bilong Papua Niugini. Seventi pesen em ol lokal bilong ol komyuniti long Hela Provins yet.

Kamapim na holim pas ol lokal wokmanmeri em wanpela bikpela samting we kampani i sanap strong long mekim.

HGDC Eneji Sevis Siaman, Libe Parindali i tok dispela awot i luksave long hatwok bilong ol wokmanmeri long wokim gutpela hai standet wok long PNG LNG projek.

“Mipela i amamas long inves long kamapim lokal talen na save. Dispela i givim ol wokmanmeri sans long kisim wok long olgeta hap long wol. Mipela kisim dispela awot wantaim daun pasin na vot bilong konfidens long teknikol, trening na save bilong menesmen”, Mista Parindali i tok.