LAS wiken planti kastoma bilong BSP i no bin amamas taim olgeta ATM long Pot Mosbi i bin no gat mani. Dispela hevi i bin kamap bikos namba bilong ol kastoma i rausim mani long ATM i go antap tru.

BSP i gat 315 ATM insait long kantri na 119 long Pot Mosbi. Long Fraide 22, 298 ATM insait long kantri i bin wok gut inap long wiken taim namba bilong rausim mani i go antap winim bipo. Planti papamama i redi long salim ol pikinini i go long skul olsem na planti widrowal i bin kamap long dispela wiken.

Ol 31 ATM masin i bin nogat mani na 33 masin i no bin gat liklik kes olsem, K20, K50 na K100 pepa mani. Taim ol kastoma laik rausim ol dispela amaun, masin i tok nogat.

Narapela as bilong dispela hevi em telekomyunikesen, wankain long ol narapela hap. Dispela i kamap bikos long planti blekaut long pawa.

Ol BSP wokmanmeri i bin wok hat tru long wiken long traim stretim dispela hevi. Ol i bin traim hat tru long pulimapim ol ATM we i bin pinis long kes. Na long wankain taim ol i save wok hat long putim ol gutpela kwaliti pepa moni i go long ATM bikos ol olpela wan i pepa mani i ken pas insait long masin na masin bai no inap wok gut.

BSP i save wok klostu wantaim Benk bilong Papua Niugini long kisim ol gutpela kwaliti pepa mani na long wankain taim em i traim long kisim moa kes bilong inapim laik bilong ol kastoma bilong en.

BSP i askim olgeta kastoma long stat yusim dijital platfom olsem, EFTPOS netwok, Intanet Benking na Mobile USSD benking.  Em i isi na hariap long baim samting na tu daunim nid bilong holim kes.

Carolyne Ketsimur i raitim