LONG taim COVID-19 i bin kamap long stat bilong las yia, planti bisnis i bin bagarap na ikonomi bilong kantri i pundaun. Nupela yia i kamap na ol bisnis i wok hat long kirap bek na go hetim wok bilong strongim ikonomi bilong kantri.

 Long wankain taim, Memba bilong Kikori, Soroi Eoe na bod bilong Kikori Distrik Divelopmen Atoriti (KDDA) na edministresin i  wok hat long bringim sevis i go long distrik bilong em.

Long taim COVID-19 i bin kamap, Memba bilong Kikori, Soroi Eoe wantaim edministresen bilong em i bin givim fanding na PPE na medikol saplai i go long Faia Helt pos, Kikori Distrik Haus sik, Karati Helt Pos na Kapuna haus sik.

Mista Eoe i tok KDDA i laik sapotim MSME na egrikalsa na em i givim strongpela toktok long ol pipel bilong em long wok hat na yusim gut helpim i kam long gavman long mekim ol liklik bisnis bilong lukautim ol famili bilong ol.

Long visit bilong em, Memba Eoe bai tokaut na mekim presentesin bilong K400, 000 i go long WASH projek we bai kamap long Kikori Sekendri skul na Belepa eria. Projek bai bringim klinpela wara i go long skul na ol komyuniti.

Na K500, 000 em bai brukim na givim long ol dispela skul, Kikori Sekendri Skul (K200, 000), Ihu Provinsal Hai Skul (K200, 000), Don Bosco Teknikal Skul Arai Miri, (K100, 000). Em i tokaut tu olsem em i putim K1 milien bilong ol egrikalsa projek, na K500, 000 bilong MSME long distrik.

Mista Eoe bai givim 4-pela moto na dingi long Wabo na bai stretim Wabo Helt Pos.

Dispela mani kam yet long COVID-19 rikavari asistens Nesenel Gavman i givim.