OL takispeia long Jiwaka i amamas nau bikos ol bai i no inap moa trevol i go long Hagen long baim takis bilong ol. Internal Revenue Commission (IRC) i opim pinis nupela opis long Jiwaka Provinsal Hetkwata long Kurumul.

Gavana bilong Jiwaka, Dokta William Tongamp na Komisina Jenerel bilong IRC, Sam Koim i opim opis long Mande Janueri 11, 2021.

Jiwaka Provinsal Gavman i bin putim dispela opis olsem hap bilong ol long strongim rot bilong kisim mani na helpim long IRC taim ol i baim takis long Jiwaka.

Komisina Jenerel Sam Koim, i tok tenkyu long Jiwaka Provinsal Gavman long givim dispela opis spes. IRC i salim tripela opisa i go long Jiwaka long lukautim opis wantaim wanpela nupela Toyota Lenkrusa bilong sapotim ol long wok long Jiwaka.

Long taim em i mekim toktok bilong em, Sam Koim i tok, “Mipela i amamas olsem IRC em namba wan ligal oganaisesin long i gat brens long Jiwaka. Dispela em wanpela komitmen mi bin mekim las yia long Jun na nau em i kamap tru.

“Mipela i brimgim sevis i go klostu long hap we ol takispeia i stap bilong helpim ol long mekim wok bilong baim takis i kamap isi. Nau ol i ken sevim fiul, PMV fea na taim bilong ol long trevol i go long Hagen.

Dokta Tongamp i tok tenkyu tru long Komisina Jenerel na tim bilong em long sanapim opis long Jiwaka. Em i tok Jiwaka i bin stat wantaim liklik mani, tasol nau ol i wok long wok isi isi i go antap.

Em i tok tenkyu tu long K1.2 milien bilong GST we IRC i bin givim las yia na em i hop bai mani i surik moa i go antap wantaim nupela opis nau i stap.