AIR Niugini i pasim ran bilong balus i go long Brisbane na Cairns stat long 15 i go long 28 Februari.

Gavman  bilong Australia i putim ol nupela lo bilong trevol i go long Australia bikos long hevi bilong COVID-19 pandemik.

Long ol dispela lo, 60 pesen ridaksen long ol pasindia em wanpela bilong ol. Em i min olsem namba bilong ol pasindia long kalap long balus i go long Australia em i go daun stat long Janueri 15.

Bikos long dispela, Air Niugini i pasim ran bilong balus i go long Brisbane na Cairns stat long 15 i go long 28 Februari.

Ol pasindia husat i bukim balus long trevol namel long ol dispela deit bai i no inap trevol, tasol ol bai wetim toksave i kam long Air Niugini.

Air Niugini yet bai stretim trevol bilong ol pasindia na putim ol long ol narapela ran bilong balus bihain long Februari 15. Bai nogat ekstra fi gen long taim bilong ribukim sia long balus.

Ol kastoma i ken rikwes long kisim ful rifan sapos balus  i no ran long ol dispela deit.

Air Niugini tok sori olsem planti pasindia bai i no inap trevol i go long Australia long ol dispela deit. Hevi em i no bilong kampani na em i no inap stretim hap bilong slip o ol narapela kos bikos long ol dispela lo we Gavman bilong Australia i putim.