INDEPENDENT Consumer and Competition Commission (ICCC)  i givim tok orait long Paradise Company long baim Hugo Canning . ICCC i bin lukluk na skelim  propos akuisisen eplikesen bilong Paradise na  em i orait na i no gat bikpela  hevi bai kamap.

Paradise Company save wokim ol kaikai olsem bisket, soklet na botol wara. Nambawan Super na Comrade Trustees Limited em ol kampani we i papa bilong Paradise. Hugo em kampani bilong Australia na i save wokim na distribiutim ol tin mit olsem Ox & Palm, Ocean Blue tin pis na ol Heinz prodak we i kam long narapela kantri.

Paradise Company i bin putim eplikesen bilong em long baim Hugo Canning i go long ICCC long 4, Desemba, 2020, na ol i kisim tok orait nau.

 Komisina na Sif Ekseketiv bilong ICCC, Paulus Ain i tok Paradise Company i laik baim Hugo long K50 milien na em bai kisim moa long 50 pesen long maket sea. Olsem na kampani i askim long kisim tok orait bilong ICCC.

“Long olgeta kliarens eplikesin, ICCC i save skelim gut ol gutpela na nogut samting we  bai kamap. Sapos ICCC i no wanbel, em i no inap givim tok orait long eplikesen. ICCC i wanbel long eplikesen bilong Paradise Company olsem na em i givim tok orait,” Mista Ain i tok.

Carolyne Ketsimur i raitim