INTERNAL Revenue Commission (IRC) i sainim wanpela Memorandum of Understanding (MOU) wantaim Post PNG long Revenu Haus Pot Mosbi.

Dispela MOU i bai helpim IRC long kisim ol postel edres bilong ol lain husat i save peim takis na ol ples ol i stap long en.

Komisina bilong IRC Sam Koim wantaim Sif Ekseketiv Opisa bilong Post PNG Peter Tepure i sainim dispela MOU.

Mista Koim i tok,  “wantaim dispela MOU em i bai helpim long painim aut sampela paul pasin ol lain bilong peim takis i wok long mekim. Ol lain husat i save peim takis bai i mas gat wan wan Private Letter Box (PLB) bilong ol.

IRC i bin painim planti hevi taim ol lain bilong peim takis i no stap long wanpela hap na i no toksave long ran bilong ol.

Ol lain bilong peim takis i save yusim ol wankain adres na dispela i save mekim IRC i hat tru long painim aut husat i no peim takis. Taim ol lain i givim Taxpayer Identification Number (TIN) aplikesen ol i save yusim ‘c.care of’ olsem wanpela adres bilong ol long kisim sevis, Mista Koim i tok.

Mista Koim i tok, ”Wantaim dispela ol i save hat tru long painim aut na kisim data bilong ol lain husat i save peim takis.”

Mista Koim i tok, “Ol lain wantaim leta bokis tasol bai kisim TIN. Post PNG bai askim long setifiket bilong TIN long husat  lain i laik kisim PLB long bisnis o ol narapela wok.

CEO bilong Post PNG Mista Tepure i tok, “Em i amamas long wok wantaim IRC long helpim long kisim data bilong ol lain bilong peim takis.

“Mipela i bai wok wantaim IRC long data bilong mipela na bai givim long ol na dispela bai helpim long kisim takis,” Mista Tepure i tok.

Koim i tok tu olsem wantaim dispela helpim IRC bai i save long raun bilong ol lain bilong peim takis.