WANTAIM sapot i kam long Kakao Bod na Provinsal DAL opis long Is na Wes Sepik Provins, STREIT i givim aut 61,493 kakao sid long moa long 10,000 fama. Sampela dispela fama em ol meri na yut.

STREIT em wanpela program we i sapotim ol fama husat i rejista na ol narapela stekholda long divelopim ol bisnis bilong ol long kakao, vanila, o long lukautim pis. Ol i givim sapot olsem klon sid kakao, ol teknikal ikwipmen, trening na kapesiti bilding na bisnis divelopmen.

Na tu ol i helpim ol fama long kisim gutpela ekses long ol fainensel sevis olsem benking na stretim ol rot bilong go long maket.

Namel long ol meri, i gat ol meri husat i gat pikinini tasol nogat man (singel mama), na ol meri husat ol man bilong ol dai pinis (wido). Dispela bai helpim ol long kisim mani na sapotim ol famili bilong ol.

Long dispela  bikpela distribiusen, 40,000 sid i go long  kakao bod bihainim Letter of Agreement (LOA), na 21,493 sid i go long ol fama. Wantaim lukluk na skelim bilong STREIT, 175 bilong ol fama husat i kisim sid em ol meri na yut.

Maski COVID-19 i bin kamap na wok i bin leit liklik, projek em i redi long go het wantaim ol sid i kam yet long 4-pela neseri long Haripmo, Hawain, Passam (Is Sepik) na Nuku (Wes Sepik).

Dispela projek bai go het yet long 2021 wantaim moa neseri na bad wud gaden we Kakao Bod na Provinsal Dipatmen bilong Egrikalsa (DAL) i sapotim.