Stori bilong Joseph Tua base liaison pailot bilong MAF

YU bilong wanem ples na yu save stap we nau?

Mi bilong liklik distrik Pangia long Sauten Hailans, ating nau em i no liklik tumas. Papa bilong mi i bilong Tengai na mama i bilong Ialibu. Long PNG yumi save bihainim ples bilong papa. Mama i bin karim mi long Goroka, Isten Hailans tasol mi bin bikpela long Pot Mosbi, Nesenel Kepital Distrik. Na nau mi stap long Hagen.

Inap yu stori liklik long famili bilong yu?

Em i bikpela famili, mipela 7-pela pikinini. Mi gat faivpela susa na mitupela brata long wanpela papamama. Famili bilong mi em ol strongpela Kristen; papamama em ol elda long sios. Mi namba tri pikinini; i gat tupela meri i kamap pastaim long mi, na tupela meri bihain long mi na tupela man na narapela meri gen. Mipela i save stap long Pot Mosbi olsem na olgeta i stap long hap na mi stap wok long hia.

Watpo na yu joinim MAF?

Mi bin kam long Mt Hagen long 2017 long statim asesmen bilong mi. I bin gt fanreising, Baibel koles na tripela mun refresa kos bilong flaim balus long Mareeba. Orait mi wokim GPSS eksam – hatpela eksam TRU! Olgeta pailot i mas wokim dispela eksam na sapos yu pas bai MAF i ken kisim yu. Mi bin tingting planti na mi ting sapos mi feil bai mi go joinim ami. Mi tok tenkyu long God bikos mi pas. Orait mi go bek gen long Mareeba long wokim konvesen trening long flai long Caravan. Em i narapela kain salens na mi laik kamap wankain olsem Volker Jacobson. Mi pas long dispela na mi kam kam stap long Mt Hagen long Mas 2019. 

Wanem samting mekim yu joinim MAF na bungim ol dispela salens?

Long taim mi pinisim flait trening skul na mi tingting long wanem hap long wok, mi bin tktok wantaim papamama. Mama i tokim mi long joinim MAF. Long taim mipela i likik yet mipela i harim nem MAF. Mipela i no klia long wok bilong ol tasol mipela i gat aidia. Long famili bilong mi, papamama i bilip long givim namba wan samting long gaden bilong yu i go bek long God. Mi namba wan pikinini bilong ol long go trening long flaim balus na mi namba wan pikinini man olsem na mama i strong tru. Mi amamas tu long dispela – mi givim namba wan wok bilong mi long God – na tu, mi putim ol pipel i go pas. Olsem na mi skelim tingting namel long MAF na ami na mi salim eplikesen. MAF tasol i bin bekim na kisim mi.

Yu mekim wanem kain wok wantaim MAF nau?

Mi wok long trening na mi trening yet na mi bin mekim wanpela test flait long Mas 2020. Tasol mi no bin pas bikos long planti ol impoten liklik samting mi mas wok long en. Mipela i bin plen long wokim narapela tupela wik trening moa na bihain bai mi yet i ken flai. Tasol sori tru, sik coronavirus i kamap na olgeta instraksa bilong mi i mas go bek long kantri bilong ol. Olsem na nau mi mekim ol wok long beis na mekim sevei long ol ples balus. MAF i bringim bek posisen bilong Base Liason Pilot na ol i putim mi long dispela posisen long Mt Hagen.

Yu amamas long mekim wanem kain wok?

Em i orait, bikos sapos mi flai tasol, bai mi no inap long save gut long ol lain i mekim wok long graun. Long PNG em i bikpela samting long save na stap gut wantaim ol arapela lain. Tasol sapos mi flai bai mi amamas moa yet.

 Wanem samting i givim bikpela salens long wok bilong yu?

Nau wet mi laik stap isi na mekim wok bilong mi. Mi laik soim ol senia bilong mi olsem mi inap long mekim ol wok, na tingting bilong mi i stap stret.

MAF i gat wanem mining long laip bilong yu?

Ol lain i stap ausait i lukim MAF olsem wanpela ogenaisesen i sevim kantri na helpim ol lokal pipel. Tasol long taim yu joinim MAF na yu flai na sevim ol pipel, yu luksave long bikpela wok yu mekim. Nau mi save tokim ol famili na pren olsem MAF i putim ol pipel i go pas long ol wok bilong en. Ol pipel i Iusim gutpela laip na sindaun long kantri bilong ol long kam hia na givim dispela kain sevis. MAF i kamapim bikpela senis long laip bilong mi na em i famili biong mi nau.

Mandy Glass i raitim

COVID-19 i afektim yu na famili olsem wanem?

Mi wari long ol likik bratasusa bilong`mi long skul bikos COVID-9 i bin stopim skul na ol pikinini i no soim intres long skul. Mi tokim ol long rit planti na mekim wok tisa i givim, tasol em ol yangpela na i no isi long stiaim ol.

Mi wari long papa bilong mi husat i pailot bilong Air Niugini i lusim wok. Dispela bai givim bikpela hevi tru long famili, bikos nau mitupela tasol i wokmani. Tasol God i bin gutpela, papa i flai yet na mipela olgeta i abrusim coronavirus. Mi amamas ol liklik i go bek gen long skul nau na ol inap long skul gut gen.