LONG 2011 moa long 60 yangpela enjinia bilong PNG i bin kisim bikpela salens long wok wantaim
ExxonMobil PNG Limited (EMPNG) aninit long Enjiniaring Rikrutmen Program bilong en.

EMPNG, opereta bilong PNG LNG projek i save ranim dispela program long tri i go 5-pela yia wantaim
trening bilong kamapim ol strongpela na gutpela skil we wol i lukluk long em. Program i gat wanpela
yia indaksen, visit long ol sait na wokbung wantaim ol ekspirens wokmanmeri.
Enjiniaring Rikrutmen Kodineta bilong EMPNG, Maria Ali i tok, dispela program i helpim gut na
kamapim ol gutpela nupela enjinia bilong PNG na EMPNG.
“Rot na teknik bilong kisim ol enjinia long wok long ol dipatmen we i wankain wantaim skul o stadi
bilong ol i helpim ol long kamap gut na kisim ol namba wan posisen long kampani. Mipela bai sanap
strong long trenim na divelopim ol gutpela wokmanmeri na lida bilong taim bihain,” Maria Ali i tok.
Tripela nupela enjinia husat EMPNG i kisim long Graduet Enjiniaring Rikrutmen Program em, Mark
Ali, Elijah Lavai na Maygh Ledimo.
Mark Ali i gat Basela bilong Maining bilong Yuniversiti ov Teknoloji long Lae, we i helpim em long
stat wok olsem Petroleum Mesamen Enjinia long EMPNG. Em i tok program i givim em sans long
yusim save em i kisim long skul.
Elijah Lavai i gat Basela long Enjiniaring na Maining long Yuniversiti ov Teknoloji na em i wok olsem
Fesilitis na Proses Sevelens Enjinia. Em i tok program i skulim em planti gutpela skil long taim em
stat wok. Na em bai yusim ol dispela skil long kamap gut moa long 5-pela yia insait long program.
Maygh Ledimo i gat Basela long Enjiniaring long Australia Griffith Yunivesiti na em i wok olsem
Instramentesen na Kontrol Enjinia. Em i tok dispela program i helpim em long lainim planti gutpela
samting long EMPNG na i helpim em tu long save gut moa long potensel bilong em long kamap
namba wan enjinia bilong PNG.

Carolyne Ketsimur i raitim