LONG Tunde Janueri 5 2021, Papua Niugini Civil na Aidentiti rejistri i bin holim trening bilong ol
sumatin husat i voluntia long helpim rejistresen bilong Nesenel Aidentiti(NID) i go het.

Ol 99 sumatin husat i voluntia long wok i kisim namba wan trening bilong ol.
Ol gret 10, 11 na 12 bai wok long 4-pela wik. Ol Yunivesiti na Koles sumatin bai wok 8-pela wik, na ol
i gat gutpela sans long kisim pemenen wok wantaim Sivil na Aidentiti rejistri sapos ol i wok gut.
Projek bilong NID i nidim 2000 wokmanmeri long wok na rejistarim ol pipel long kantri. NID em
impoten bikos em i givim wan wan manmeri na pikinini rait long kamap sitisen bilong PNG.
Noel Mobiha, Rejistra Jenerel i tokaut olsem i gat NID opis nau long Kokopa na Lae. Na i gat tupela
kain rejistresen bai stap. Fixed- Rejistresin o rejistresen insait long opis na Mobile rejistresen o ol
wokmanmeri raun na rejistaim ol pipel long rurel eria.
Tripela sumatin, Elvis Luther 25, DWU sumatin, Jimmly Kiapa 24, ITI sumatin na Christy Kiapa 23, Pot
Mosbi Bisnis Koles, i bin amamas long kamap volutia long wok bikos ol laikim tru PNG.
“Planti taim yumi singaut long gavman long helpim kantri, tasol bai yumi wan wan mekim wanem
long helpim kantri? Dispela astingting i strongim mi long kamap wanpela voluntia,” Elvis i tok.
“Mi save harim planti komplen olsem ol NID i isi isi tumas na ol pipel i wet longpela taim long kisim ol
NID bilong ol, olsem na mi kam voluntia long givim han bai wok i hariap na inapim laik bilong ol
pipel,” Jimmly i tok.
“Planti sumatin i graduet long Yunivesiti na Koles tasol ol i stap nating long haus, nogat wok. Dispela
em gutpela sans bilong mi long soim olsem mi ken wok gut na kisim pemenen wok long helpim
kantri,” Christy i tok.
Mista Mobiha i givim bikpela tok amamas i go long ol sumatin na em i tok dispela em namba wan rot
bilong kisim bek PNG.
Carolyne Ketsimur i raitim