INTENESENEL Fainens Kopresen (IFC) i tok Papua Niugini i wanpela “gol main” long wok bilong turisim.

Em i tok bikos long planti kain kain samting kantri i gat (manmeri, kalsa na bus graun –flora na fauna) PNG inap pulim moa turis i kam insait long kantri.

Em i mekim dispela tok i no longtaim i go pinis long taim em i lukluk bek long skelim kain salens coronavirus (COVID-19) i givim long dispela sekta.

Em i tok bipo long COVID-19 i kamap turisim sekta i bin kamapim K260 milien (US$78m).

IFC we i han bilong Wol Benk na i tok dispela mani i kam long 34,600 manmeri husat i bin kam long kantri long 2019.

Em i mekim wok painim aut long dispela mak bihain long em i pinisim wanpela sevei long ol lain husat i kam long PNG.

Em i painim aut olsem 54 pesen long ol turis i kam long PNG long namba wan 6-pela mun bilong 2019 i soim planti i kam long wok bisnis, 30 pesen i kam olsem turis na 16 pesen i kam long lukim ol famili.

Em i tok dispela i tri pesen tasol long ol lain husat i kam long ol Pasifik Ailan rijon olsem turis.

Em i tok ol sekta husat i kisim gut mani long dispela em ol lain husat i givim sevis long ples bilong slip olsem ol hotel. Ol i kisim US$31.2 milein (K103 milien), ol lain husat i givim sevis olsem balus US$US23.7 milien (K79 milien), kaikai na drink US$8.3 milien (K27 milien), transpot US$3.8 milien (K12.7 milien) na raun raun insait long kantri US$3.6 milien (K12 milien.)

Long bikpela piksa IFC i tok ol turis i yusim K757 long wanpela de.

Askim i go long ol long watpo ol i kam long kantri, ol i tok ol i kam bikos long kalsa na histori bilong Papua Niugini.

IFC i bilip turis bisnis long kantri i ken kamapim sampela ol gutpela samting.

“Wantaim gutpela invesmen long infrastraksa, kepsiti bilding, prodak divelopmen, maketing na daunim ol lo bilong wok bisnis, dispela i ken kamapim gutpela sindaun long komyuniti.

Em i tok PNG i ken kamapim olsem K391 milien mani long turis maket na mekim em i kamap wanpela top turis kantri long wol.