Las MAF balus long skai long de bipo long Nu Yia, 31 Desemba 2020 em P2-MAH. Philip Sutter i bin
stap long sia bilong kepten na Joseph Tua i bin namba tu pailot na i sindaun long raithan.

Philipp i
stori long sampela samting i bin kamap long dispela de.
BIPO long balus i lusim Mougulu, mipela i bin kisim wanpela V2 Track toksasve sapos mipela i gat
inap taim na fuel long go kisim wanpela sikman long Wawoi Falls na lusim em long Kiunga. Wawoi
Falls viles i stap longwe tru namel long bikbus arere long bikpela wara kalap bilong Wawoi Riva.
Dispela riva i kam long Mt Bosavi (8,100ft) na i ran go kamap long hap bilng Galp Provins.
Mak bilong Mougulu i go long Wawoi Falls em samting olsem 40 nautical mail, tasol em i stap long
narapela hap long rot we mipela i laik flai i go long en. Mipela i paitim toktok na lukim olsem mipela i
bin kisim ekstra 60 minit fuel long Mt Hagen bikos nau em i taim bilong ren. Long mekim dispela ran,
bai mipela i yusim 20 minit fuel long go na kam na bai gat 20 minit fuel long go long Kiunga.
Mipela i kisim ripot long Kiunga olsem i no gat ren olsem na mipela i go. Dispela sikman em wanpela
pikinini man, Mark husat i gat 10-pela krismas. Wanpela wik i go pinis, Mark i bin pundaun long diwai
na brukim bun long rait lek bilong em. Em i pilim en na i no gat sapot long lek bilong em inap wan
wik.
Medivek kit long balus i helpim em gu tru. I gat gumi matras we Mark i slip na ol let na rop bilong
pasim em gut. Papa bilong Mark i wok long holim lek bilong em i go antap long stopim pen.
Long Wawoil Falls mipela i laik tek-of long ranwe 31 tasol long taim mipela i redi, planti klaut na ren i
pundaun. Orait mipela i mas go bek gen na traim tek-of long ranwe 13. Balus i redi long tek-of nau
mipela i lukim tempretsa gan mipela i save yusim long was long COVID-19, i slip i stap long graun.
Mipela i bin putim long wing strat na i lusim ting long en. Joseph i holim brek bilong balus na mi go
ausait hariap na kisim. Mi ting God i putim ren na ol klaut long rot na mekim mipela i kam bek na
painim tempretsa gan.
Long taim mipla i flai i go long Suabi long kisim ol arapela sikman, bikpela ren na klaut i pasim ples na
mipela i no inap long go daun olsem na mipela i flai i go olgeta long Kiunga.
Mipela i yusim HF redio long toksave long Lakis, beis menesa bilong mipela long Kiunga long ringim
embulens. Long taim balus i go pundaun wanpela Toyota Lenkrusa i kam wantaim skul stretsa na
mipela i apim Mark long balus na i go stret long embulens.
Stori na ol poto –Philipp Sutter