LOMBO o sili (chilli) em wanpela naispela spais o samting long kukim wantaim ol kumu na
sayor na tu mekim sup na amamas long taim bilong kaikai.

Ol pati na ol spesel selebresin na dispela samting em feveret tru bilong ol lain bilong Saina na
India.
Lombo o sili i save mekim kaikai bilong ol dispela lain i hat tru na maus i save paia stret.
Tasol ol i save laikim tru bikos em tumbuna stail bilong ol long redim kaikai na taim kaikai i hat
em ol i save amamas na mekim save gut tru long en.
Long Madang taun em planti taim ol lokal fres fud fama i save go salim long bikpela maket long
taun na tu ol lokal maket long ples na haus-lain.
Tru tumas Madang taun nau i gat planti ol lain bilong kantri India na Saina i wok mekim wok
bisnis long hap na ol dispela lain i save laik baim fres lombo o sili long ol lain long ples.
Ol lain wokman bilong Saina husat i save wok wantaim MCC o Ramu NiCo long Madang i save
laik kukim kaikai wantaim lombo olsem na ol i save baim lombo long planti na sampela taim ol
lokal fama i save bringim i go long wok ples bilong ol na ol i save baim.
MCC i kamap olsem maket nau bilong ol lain i bringim lombo go stret na ol lain Saina i save
skelim na baim long ol.
Dispela i givim mani i go long ol lokal pipel long helpim ol long baim rais, suga na tinpis long
karim i go bek long haus na amamas wantaim famili.

James G. Kila i raitim