WANPELA bikpela hanmak bilong Sir Mekere Morauta long PNG tude, em long kamapim National Superannuation Fund (NasFund) long 2002 long kisim ples bilong National Provident Fund (NPF).

Sir Mekere i bin mekim dispela senis bihain long ripot bilong Komisin ov Inkwairi long NPF i soim olsem i no gat strongpela banis bilong lukautim mani bilong supaenuesen fan na i isi long ol lain i paulim mani. Gavman i save kisim dinau long NPF long taim em i sot long mani, tasol em i no save bekim hariap.

Dispela komisin ov inkwairi bilong NPF, i painim olsem bikpela paul pasin i bin kamap na ritaimen sevings bilong ol woka i bin lus olsem na NPF i mas katim mani bilong ol memba long stretim dispela hevi. Ol memba i no amamas bikos ol i bin lusim bikpela mani tru long sevings bilong ol.

Nesenel gavman i bin kamapim NPF long lukautim ritaimen mani bilong ol woka bilong ol kampani  wankain olsem POSF i mekim long mani bilong ol pablik sevan. Olgeta potnait ol kampani we i gat moa long 20 woka, i mas katim 5 pesen long pe bilong wokman na kampani yet i mas putim 7 pesen antap long en na salim i go long NPF. Dispela lo i karamapim tu ol wokmanmeri bilong ol arapela kantri husat i tok long ol kampani.

Dispela senis gavman bilong Sir Mekere i bin mekim long 2003 em bin hap plen bilong gavman long praivetaisesen. Long dispela plen gavman i salim bisnis han bilong em husat i no wokim profit, i go long ol lain i ranim olsem wanpela praivet kampani.

Gavman i bin salim PNG Banking Corporation long Bank South Pacific long K233,000,000 long Novemba 2001.

Ol arapela bisnis han bilong gavman ol i bin makim long salim long dispela taim tu em, Air Niugini, Telikom PNG, PNGPost, PNG Habours Board na ol wara kampani bilong gavman.

Gavman bilong Sir Mekere i bin traim long salimTelikom PNG Ltd long taim bilong ileksen namel long 2002, tasol taim Somare i bin stopim long taim em i bin winim ileksen.

Gavman bilong Somare i senisim sampela hap bilong IPBC Act tu na larim Nesenel Ekseketiv Kaunsil (NEC) long givim tok orait long  praivetaisesen o mekim ol senis long menesmen bilong ol privetais kampani.

Anna Solomon i raitim