MANDE kakaruk em i wanpela liklik  bilong kakaruk bisnis insait long Gabsongkeg, Nadzab. Tim Numilengi papa bilong dispela bisnis, em wanpela fud sains greduet na i bin wok long sekta bilong wokim ol kaikai wantaim ol kainkain divelopmen program long Pasifik rijon long sampela yia.

Wok bilong Tim i bin helpim em long luksave long proses bilong wokim ol kaikai long fektori. Bihain long em i luksave long wanem bai wok gut na wanem no inap wok gut. Taim em i pilim amamas nau em i makim projek bilong em.

Tim i bin statim pepa wok bilong dispela projek bilong em long sampela yia i go pinis. Bihain em i mekim sampela wok painimaut long maket bilong projek, em i visitim ol lokal kakaruk fama long ples, bihain em i  sanapim Mande kakaruk.

Em i stat olsem wanpela poltri fama, na i save saplaim Niugini Tablebirds wantaim kakaruk. Bihain long 8-pela yia, Tim i sanapim liklik fektori bilong em.

“Tupela bikpela saplaia bilong kakaruk long PNG, Niugini Tablebirds na Zenag i no save inapim maket bilong PNG. Ol i save sot long kakaruk na impotim long Malaysia na Australia long inapim maket diman,” Tim i tok.

Em i tok moa olsem em i bin seivim mani long sampela yia long inves long dispela bisnis. Em i baim masin bilong hatim gras bilong kakaruk bai isi long rausim. Na sink wara bilong wasim na klinim kakaruk na masin bilong katim kakaruk long hap hap bilong ol. Wantaim bokis ais bilong mekim ais kakaruk. Bihain em kisim bren nem, bakod na i statim bisnis bilong em.

Nau Tim i save kilim 1000 kakaruk long wanpela wik. Em i gat 21 wokmanmeri. Na em i salim kakaruk long K13.50. Em i tok, dispela i no bilong resis wantaim Niugini Tablebirds na Zenag, tasol bilong helpim long inapim laik bilong ol kastoma.

Wantaim COVID-19 nau, bisnis i pundaun liklik i go daun. Olsem na em i askim gavman long painim sampela rot bilong kirapim bek ol bisnis na ikonomi bilong PNG. Na tu gavman i mas lukluk long divelopim infrastraksa.