LONG Sande 20 Desemba, paia i bin kamap long kebol trei long Moto Control Centre (MCC) long proses masin bilong Ok Tedi.

Paia i bin kamapim bagarap long ilektrikal na komyunikesen kebol na sampela hap bilong MCC.

Menesing Dairekta na CEO bilong Ok Tedi, Musje Werror i amamas olsem ol imejensi tim i bin ekt hariap long putim aut paia bipo long em i kamapim moa bagarap long ol masin na long ol wokmanmeri.

Mista Werror i tok bagarap i bin kamap bai stopim wok inap long 3-pela wik, tasol i ol lukluk long stretim hariap.

Ripot bilong dispela hevi i go pinis long Sif Inspekta bilong main na bai gat investigesen bai kamap long painimaut rot bilong hevi.

Hevi i afektim ol laspela prodaksen bilong yia 2020, tasol kampani i mekim komitment long pinisim wok long Jenuari.

Mista Werror i tok OTML i redi long baim ol ekspens bilong dispela hevi.

“Mipela i save putim mani bilong stretim ol kain hevi we i save kamap. Na tu mipela i gat K6000 milien insurens bilong bisnis we i bagarap,”

Em i tok moa olsem planti wokmanmeri i malolo na selebret wantaim ol famili bilong ol tasol tim long OTML bai wok de na nait long stretim dispela hevi.

“Mi amamas tru long gutpela wok na dedikesen bilong ol wokmanmeri long OTML,” Mista Werror i tok.