YIA 2020 i no bin gutpela yia bilong bisnis wantaim hevi bilong COVID-19. Tasol long wankain taim COVID-19 i opim dua bilong nupela pasin bilong mekim bisnis.

Long go het wantaim bisnis planti suruk i go long ol onlain pletfom bilong treding na benking.

Ol kibung na konprens tui  suruk i go onlain.

Long dispela taim gavman bilong Praim Minista James Marape i bin givim K100 milien i go long BSP. Dispela i bin kamap bihainim tingting bilong strongim na mentenim bisnis long grasruts level i kam antap.

Dispela mani i stap nau long lukaut bilong BSP na planti manmeri i stat kisim dinau pinis na statim ol liklik bisnis bilong ol.

Long wankain taim tu Memba bilong Not Is, John Kaupa i bin amamas tu long givim K3 milien i go long ol mama bilong NCD. Moa long 280 grup bilong ol meri husat i rejista pinis i kamap long dispela taim Mista Kaupa i bin mekim dispela presentesen.

Namel long ol hevi bilong COVID-19 long mun Februari, gavman i bin tok nogat long P’nyang gas dil na long mun Jun em  i bin pasim Porgera main.

Planti kros toktok i bin kamap long Porgera main tasol Praim Minista James Marape i sanap strong long tingting bilong kisim bek PNG na i no larim Barrick Gold i pusim em na gavman bilong em. Porgera i op gen long Septemba bihain long gavman i sainim nupela agrimen wantaim kampani.

COVID-19 i givim hevi tu long turis siping na eviesen indastri. Planti turis opereta i pasim wok. Ol balus kampani i stop long ran na ol pipel tu  kisim taim. Ol turis sip tu i kisim bikpela taim, taim Milen Be na Is Nu Briten Provins i tok nogat long ol turis i lusim sip na go lukluk raun long tupela provins ya.

Bikpela hevi moa i bin kamap long ol  wokmanmeri. Planti kampani i bin lusim ol wokmanmeri i go long wanem ol i no inap baim ol moa. Dispela i kamapim hevi long ol famili taim ol i no gat mani long baim kaikai na lukautim ol yet.

Long dispela taim ol supanuesen i mas mekim sampela samting long helpim ol wokmanmeri i lusim wok. NASFUND i kisim tok orait long gavman long peim ol wokmanmeri long ol seivings bilong ol.

Carolyne Ketsimur i raitim