LONG planti hap bilong Papua Niugini long dispela taim bilong Krismas na Nu Yia em taim bilong planti ren i save pundaun na ol bikpela wara i save tait na givim hevi long wokabaut bilong ol manmeri.

Dispela hevi bilong ol wara i tait na i givim hevi long ran bilong ol kar na go kam bilong ol pipel bilong Madang-Saidor haiwe.

Dispela rot em nesenel rot insait long provins tasol gavman i no luksave long en na nogat gutpela wok i kamap long wokim ol bris o stretim rot long Madang i go long Saidor gavman stesin. Olsem na tude planti pipel bilong Raikos long nambis i save yusim moto bot na ran i go kam long solwara long wokim bisnis, salim fres kaikai na tu kisim ol gavman sevis.

Long las wik Toyota Lenkrusa bilong wanpela man bilong Lalok viles, Molex Mab i mekim gutpela pasin long helpim ol mama bilong Astrolabe Be husat i bin laik go bung long enuel jeneral miting bilong Kostal Paiplain Wimen Asosiesin long Lalok viles.

Molex i yusim olpela Lenkrusa bilong em long bringim ol meri i go long AGM bilong ol bikos ol PMV trak i hat tru long katim ol Yowor na Minjeng wara.

Molex Mab i soim trupela pasin husat i gat gutpela tingting long helpim ol arapela i nidim helpim.

Long dispela taim namel long ol meri, em i givim helpim tu long wanpela opisa bilong Pipel’s Maikro Benk husat PMV i lusim long hapsait bilong Yowor Wara na em i kisim opisa na bringim em i go olgeta long Lalok viles long AGM bung.

Molex i soim ‘Gut Samaritan’ pasin na ol manmeri long rurel Bugati komyuniti long Astrolabe Be LLG long Raikos distrik i amamas.

Bugati eria long Raikos distrik em eria we i save saplai long ol fres gaden kaikai na kumu i go long Madang taun maket.

Ol mama long Bugati em ol bikpela pes long taun maket na ol i save sevim gut Madang taun pipel.

James G. Kila i raitim