LONG PNG, 87 pesen bilong populesin i save stap long rurel eria, na planti i save stap long strong bilong faming bilong kisim mani na lukautim famili.

Hela provins em wanpela bilong ol dispela provins we i stap long rurel eria. Bipo ol pipel long Hela i stap long tudak, tasol nau  bikpela senis i kamap.

Dispela i kamap bikos long mama maining kampani ExxoMobil. Kampani i bringim planti gutpela senis i go long ol komyuniti long Hela Provins.

Wanpela gutpela sapot projek em Community Livelihood Improvement Project (CLIP). ExxonMobil i sapotim na i wok wantaim ol group bilong ol mama long ol komyuniti.

CLIP i save givim trening na skulim ol meri long ol kain kain rot bilong planim kaikai o egrikalsa na faming. Em i helpim ol tu long salim ol kaikai bilong ol na go insait long ol liklik bisnis.

Keroti Andane bilong Nogoli Womens Grup na  Serah Tindipaya bilong Paiya Women Grup i tok ol i amamas tru long dispela projek.

Tupela i tok dispela projek i helpim ol long kisim mani na lukautim ol famili bilong ol. Ol pikinini bilong ol i go long skul nau bikos ol i gat mani. Ol i gat mani bilong go long haus sik. Na tu ol i no moa wetim ol man bilong ol long givim mani long ol.

Ol dispela meri grup i save bringim ol kaikai bilong ol i kam wantaim, bungim, skelim long kilo na salim long Hides Gas Conditioning Plant (HGCP). Kampani i save baim gaden kaikai long mani mak olsem K4,000 na K5,000 long wanpela wik.

Mani i save go long benk akaun bilong grup na bihain bai wan wan meri i kisim sea bilong em.

Ol narapela projek we ol mama i stat long mekim nau em bakeri o bisnis bilong kukim skon na salim, poltri, bisnis bilong lukautim kakaruk na salim kiau.

Tasol bikpela salens bilong ol em transpot. Ol mama i gat bikpela laik long gat trak we i ken helpim ol long karim ol kaikai bilong ol i go long maket.

Bikos long ol dispela divelopmen, ol komyuniti long Hela provins nau i senis na i wok long kamap gut moa long taim bipo.

Carolyne Ketsimur i raitim