NATIONAL Superannuation Fund (Nasfund) i bin sainim Memorandum Ov Understanding (MOU) wantaim provinsal gavman long helpim ol pipel long kisim sans long seiving na invesmen long provins.

Nasfund Siaman Charles Vee na Gavana bilong Is Sepik Alan Bird i bin sainim MoU long Fraide 11 Desemba. Dispela em namba wan taim Nasfund i wokbung wantaim provinsal gavman.

Dispela i kamap bihain long Gavana Bird i bin askim Nasfund long sapotim na helpim ol fama long provins bilong em long pasin bilong seivim mani.

Is Sepik i go pas long egrikalsa komoditi olsem kakao, vanila na kofi long kantri. Planti fama i save mekim planti mani tasol ol i no save seivim gut.

Dispela MoU bai adresim seiving na invesmen sans long provins. Gavana Bird i lukluk long tanim kakao indastri long Is Sepik i go long K100 milien ikonomi long 5 yia taim.

Na tu invesmen long ol arapela indastri olsem rais, wel pam, petroleum, mineral, timba na fiseris.

Wok bilong dispela visen i stat pinis na ol gutpela risal i kamap pinis.

Nasfund bai mekim awenes wantaim helpim bilong provinsal gavman long ol prodak na sevis bilong em.

“MoU i karamapim ol infomesen bilong komes indastri databeis, we ol kamapani i mas bihainim taim ol i baim supaeunuesen bilong ol wok manmeri bilong ol i go long ol atorais supaenuesen fand,”

“Long dispela bai tupela pati i ken save long hamas kampani i wok long Is Sepik na i rejista wantaim Nasfund,” Mista Bird i tok.

“Dispela komitmen Siaman bilong Nasfund i sainim bai stap longpela taim,” Joint Sif Invesmen Opisa bilong Nasfund Judah Waffi i tok.