KINA benk nau i kamap namba tu bikpela benk long PNG bihain long  em i baim aut Wespac long Pasifik na Papua Niugini las wik.

Ol seaholda bilong Westpac long PNG (Nambawan Super na Motor Vehicle Insurens Ltd) bai kisim bek ol sea mani bilong ol bikos long dispela.

Mani mak we Kina benk i yusim long baim Westpac inap olsem K1.036 bilien.

“Taim mipela i baim Westpac, em i givim strong na helpim Kina benk i kamap bikpela. Nau Kina bai kisim luksave olsem wanpela bikpela benk,” CEO na Menesing Dairekta bilong Kina Greg Pawson i tok.

Westpac i mekim dispela tingting bikos em i laik fokus long konsuma benking bisnis long Australia na Nu Silan. 

Kina benk i kamap bikpela nau na bai gat planti kastoma inap olsem 523,255 long PNG na Fiji bai gat moa long 318,968 kastoma.

Planti kastoma bai gat ekses long dijital benking wantaim Kina benk na dispela bai sapotim ikonomi bilong kantri long taim bihain. Na long wankain taim em i moa isi long mekim dijital benking wantaim Kina benk.

Nau  Kina benk bai  gat strongpela kompetisen wantaim namba wan benk bilong PNG na Pasifik, Benk ov Saut Pasifik (BSP).

Carolyne Ketsimur i raitim