EM i klostu taim bilong selebretim krismas na nu yia olsem na planti pasindia i wok long trevol long dispela taim.

Air Niugini i laik helpim ol kastoma na i apim sevis bilong em long i napim laik bilong ol long trevol na kamap long ples long taim bilong amamas wantaim ol famili.

Air Niugini i statim namba wan ran bilong Boeing 737 i go long Kagamuga ples balus long Maunt Hagen long dispela wik 14 Disemba bihain long em i bin mekim test ran bilong em long Desemba Fonde 10. Balus i bin lusim Mosbi na go long Hagen bihain go bek gen long Mosbi olsem test ran.

Bihain long dispela namba wan ran, B737 balus bai go kam long Kagamuga ples balus bikos planti pasindia bilong Hailans rijon i save trevol long. Dispela rut

Boeing 737-700 inap long karim 116 pasindia long wanpela ran. Balus ya i gat 12 bisnis klas si na 104 ikonomi klas sia. Dispela bai helpim gut laik bilong ol pasindia long dispela bisi taim.

Sif Eksektiv bilong Air Niugini Bruce Alabaster i tok, “B737 bai wok i go olsem long Maunt Hagen na Fokker balus bai wok long ol narapela provins long dispela bisi taim”.

Alabaster i tok moa olsem Link PNG i kisim namba tu Q400 balus bilong em pinis na bai statim ron bilong em i go long Rabaul tasol.

Ranwe o ples ran bilong balus long Tokua em stap nau long mentenens olsem na National Airports Corporation (NAC) i sotim inap tasol long ol liklik balus olsem Dash-8 i ken pundaun na kirap long en. Tupela Q-400 nau bai helpim long karim moa pasindia.

Nupela sevis bilong Air Niugini na Link PNG em i stap olsem;

• Balus bai ran long Mosbi na Lae long 7-pela de.
• Goroka na Madang 2-pela ran long wanpela de.
• Kavieng, Hoskins na Manus olgeta de.
• Wewak, Lae na Madang tupela taim long wanpela de.
• Vanimo olgeta de.
• 5-pela de long Buka (Mande, Tunde, Fonde, Fraide na Sarere) na wanpela moa long Trinde.
• Olgeta de dairek ran long Hoskins na olgeta de ran bilong Dash 8 Long Mosbi-Lae-Hoskins-Rabaul.