BIHAIN long ol konstraksen wok bilong PNG LNG i pinis planti pipel long ol impek eria bilong projek long Sentral Provins i no gat moa wok.

Tasol dispela i no min ol i stap nating.

Ol lenona kampani i helpim ol long go het long ol wok ol i bin wokim pastaim long kampani i kam.

Long Boera ples lenona kampani Gas Resource PNG LNG Plant Limited (GRPL) i mekim praioriti bilong em long sapotim ol klen long komyuniti bilong en.

Mis Ulato Avei, Siameri bilong GRPL i bin stori wantaim ol nius lain long transit haus bilong em na famili bilong em long Koke Hanua na i tok, “Em i no isi long ranim lenona kampani tasol mipela i mas toktok wantaim kampani na bringim ol sevis ol pipel i laikim.

“Gavman i givim namba wan peimen pinis em K16 milien bilong 4-pela ples na mipela i katim inap stret long olgeta 4-pela ples. Insait long dispela K16 milien Boera ples i kisim 21 pesen.

“Na long Boera mipela i mas skelim gut gen na inapim olgeta klen,” Mis Avei i tok.

Ol i kisim tu namba tu peimen tasol bikos prais em i daunbilo ol i bin kisim samting olsem K15 milien o aninit long en.

Wantaim dispela ol mani ol i sanapim ol klasrum, haus tisa, wara tenk na helt senta we i stap long praioriti plen bilong GRPL. Na tu ol i givim aut ol moto bot bilong ol man i ken go kisim pis long solwara na salim long maket.

GRPL  i amamas tu long ol sans i kamap. Wanpela dispela sans em Dirio Pawa we ol i wanpela bikpela seaholda long e.

Ol i lukluk long kirapim ol liklik bisnis na ol MSME insait long ol klen tu tasol dispela em i hat long wanem ol klen i bikpela tumas. Boera i gat 14 klen.

Long Boera ol i gat wanpela tras fan tu bilong ol yangpela long bihaintaim. Misis Avei i tok dispela mani ol i no inap tasim. Em i bilong ol pikinini long bihaintaim.

Mis Avei i tok tu olsem ol komyuniti long Hiri i no inap stap wankain moa long ol yia i kam. Ol i mas go fowot.

Tasol em i luksave tu olsem long PNG ol pipel i no gat pasin bilong seivim mani na tu ol yangpela i no tingting long bihaintaim. Em i tok senis bai i kamap sapos ol pipel i senisim tingting bilong ol na wok hat long kamapim gutpela sindaun.

Mis Avei i amamas long ol sans i stap na long ExxonMobil long gutpela patnasip ol i gat.

Rosa Koian i raitim