PLANTESIN diwai bilong PNG Biomass i wok long suruk i go bikpela moa yet long Markham Valley.

Olsem na kampani i strongim ol papagraun long prektisim inta-kroping o pasin bilong planim kes krop namel long ol diwai.

Dispela prektis bai helpim ol papagraun long yusim gut graun we bai helpim ol bek gen.

Long planti komyuniti, graun em hat tru long mekim fam, bikos em ekspensiv long klinim na stretim. Tasol PNG Biomass i helpim long brukim graun na klinim wantaim ol masin bilong ol. Na graun i isi long planim kes krop.

Long mekim inta-kroping, PNG Biomass i laikim ol papagraun long bihainim ol liklik lo tasol.

Wanpela tim bilong PNG Biomass  i bin holim trening bilong inta-kroping na skulim ol pipel long rot bilong bihainim na mekim gut inta-kroping.

Moa long 30 fama i bin kamap long dispela trening long ples Mempem-ampes.

Ripot bilong inta-kroping long 2019 i soim olsem wan wan famili i bin mekim K3000 long namba wan haves. Na long dispela taim 400 famili i bin prektisim inta-kroping. Mani mak we i bin kamap long long wanpela yia em K2.4 milien.

Ol fama i save salim ol kaikai bilong ol Markham yet na sampela long Hailans rijon.

Oil Search Kantri Menesa Leon Buskens i tok PNG Biomass i soim rot we ol kampani i mas bihainim long wokbung wantaim ol papagraun na komyuniti.

“Mipela i harim tok bilong ol. Wanem samting ol i laikim na hop long kisim long taim bihain. Mipela i wokbung wantaim long kamapim tras na andastending namel long tupela grup. PNG Biomass i wok wantaim ol pipel long Markham long 10-pela yia nau. Dispela i kamapim gutpela invesmen long praivet sekta,” Mista Buskens i tok.

Carolyne Ketsimur i raitim