ANINIT long Dipatmen bilong Egrikalsa na Laipstok, komoditi bod bai gat ekses long K50 milien bilong Prais Sapot program.

Dispela toktok i kamap bihain long bod i sainim Memorandum of Understanding (MOU) long Sentral Gavman Opis wantaim K50 milien program.

Wan wan komoditi i kisim skel mani makim revenyu ol i kisim long foren eksens na mak bilong komoditi prodaksen.

Sekretri bilong Dipatmen ov Egrikalsa na Laipstok Daniel Kombuk i tok dispela program i bin kamap bikos ol lida i lukim olsem egrikalsa i ken kamapim gut ikonomi bilong PNG long dispela taim.

Sekretri Kombuk i tok mani bai go long sapotim prais bilong ol komoditi olsem kakao, kopi na kopra. Em i tok dispela em namba wan taim dispela kain program i kamap na bai helpim gut ol fama.

“Long dispela ol fama i ken gat strongpela tingting long apim prodaksen bilong ol komoditi,” em i tok.

Dispela projek bai stap long gutpela lukaut na em bai stap em yet wantaim menesmen unit we bai lukautim. Ol ripot na odit bai kamap long soim olsem mani ol i yusim gut long mekim wok.

Komoditi bod i sainim ol MoU bilong ol pinis na redi nau long karim aut sabsidaisesin bilong ol prais.