FOOD and Agriculture Organization (FAO) i amamas long strongim wok bilong groim kwaliti kakao fama long tupela Sepik Provins.

Long las wokabaut bilong em i go long Wewak, Kantri Representiv Ken Shimizu i tok, dispela wok bung em bilong helpim smolholda fama na em bai i putim mani long poket bilong ol fama.

Mista Shimizu i tok olsem dispela rot inap long stretim slip na sindaun bilong ol yut na meri  aninit long dispela wok bung wantaim European Union (EU) we tupela grup, FAO na EU i putim mani long dispela “Support To Rural Entreprenuership Invesment and Trade (STREIT) Papua Niugini”.

Wanpela saining bilong Memorandum Of Understanding ( MOU) namel long FAO na Paradise Foods Ltd i bin kamap long Wewak long 26 Novemba 2020.

Dispela  MOU em long strongim na kamapim wok bung wantaim FAO na Paradise Food Limited long sapotim lokal bisnis manmeri long egri-bisnis na ol fama long mekim kamap bikpela tru  wok bilong kakao prodaksen bihainim veliu sen bilong kakao long fam i go long fektori na kamap soklet.

Aninit long dispela MOU, FAO i sapotim ol fama wantaim trening na kakao sid bilong groim gutpela kwaliti kakao na ol pipel i ken salim kakao bilong ol long Paradise Food.

FAO em i wanpela lid ejensi bilong United Nations long go pas long STREIT program insait long 10-pela distrik insait long Is na Wes Sepik Provins.

Insait long wok bilong en, FAO i givim aut pinis ol kakao sidling, polibek na trening. Dispela ol sidling em ol nupela kain we i gat banis long sik kakao pod bora.

Ol pipel long Is Sepik Provins i amamas long dispela gutpela sans we bai i helpim ol long kamapim gutpela sindaun.

Jonathan Poema i raitim